Kiongozi wa Kanisa Katoliki nchini Mwadhama Polycarp Kardinali Pengo akisalimiana na mzee wa makamo jijini Dar es Salaam
Dar es Salaam. Kiongozi wa Kanisa Katoliki
nchini Mwadhama Polycarp Kardinali Pengo ameishukuru Serikali ya Uswisi
kwa kulisaidia kanisa hilo, nchini kuanzisha Kituo cha Maendeleo
Msimbazi ili kutoa huduma kwa maskini na jamii ya Tanzania.
Pengo ambaye pia ni Askofu Mkuu wa Jimbo Kuu
Katoliki la Dar es Salaam, alitoa pongezi hizo jana katika misa ya
maadhimisho ya miaka 50 ya kituo hicho iliyofanyika jijini Dar es Salaam
jana, huku akiwaonya viongozi wenye nia ya kujinufaisha binafsi na
kituo hicho.
Alieleza kuwa kwa kushirikiana na Serikali ya
Tanzania Uswisi imeweza kujenga kituo hicho kilichoweza kutoa msaada ya
aina mbalimbali kwa maskini na jamii bila ya kupata faida.
“Serikali ya Uswisi kwa kushirikiana na Serikali
ya Tanzania imeweza kusaidia uanzishwaji wa kituo hiki ambacho
leo(jana)kimetimiza miaka 50 kwa ajili ya kutoa huduma kwa maskini na
jamii kwa ujumla,”alisema.
Alisema kuwa Kituo cha Maendeleo Msimbazi hakiwezi
kufananishwa na asasi za kiraia au benki za biashara kwa sababu
kimejikita katika kuwasaidia wananchi wasiojiweza ili kupata msaada na
kujiondoa kwenye umaskini.
Kutokana na hali hiyo, Kardinali Pengo aliwataka
wananchi kutafakari mambo yaliyofanywa na kituo hicho licha ya kuwapo
kwa changamoto za kibinadamu alizosema haziwezi kurudisha nyuma utendaji
wa kazi zao.
Alisema kuwa kituo hicho kimeweza kutoa huduma
katika kipindi chote cha misa 50 bila kuangalia masilahi binafsi, jambo
lililosaidia kuleta maendeleo katika nyanja mbalimbali za kiuchumi na
kijamii nchini.
Alibainisha, viongozi ambao walikuwa na malengo ya
kujinufaisha wenyewe wameshindwa kufanya hivyo katika kituo hicho
kutokana na kutofautiana malengo ya uanzishwaji wake.
Alifafanua kuwa katika ulimwengu wa sasa, shughuli
za maendeleo zimeweza kuwasaidia wananchi kujiepusha na mambo
mbalimbali yanayorudisha nyuma maendeleo, hivyo wanapaswa kujifunza
mambo yatakayosaidia kukuza uchumi.
“Mpaka sasa tunaweza kujivunia mambo mbalimbali ya
kimaendeleo yaliyofanywa na kituo hiki bila ya kupata faida, jambo
ambalo linapaswa kuigwa na watu wengine,”aliongeza.
Alibainisha, kutokana na hali hiyo, wameweza
kutekeleza mpango wa Yesu Kristo aliyeweza kujitoa kwa binadamu bila ya
kutaka malipo au faida yoyote.
Akizungumza kwa niaba ya Mkuu wa Mkoa wa Dar es
Salaam, Mkuu wa Wilaya ya Ilala, Raymond Mushi alisema kuwa, Serikali
itaendelea kushirikiana na wadau mbalimbali ili kuhakikisha wananchi
wanapata huduma bora
